गुलरिया नगरप्रमुख मुक्तिनाथ यादवद्वारा स्वास्थ्य शाखाका कर्मचारीलाई बढुवाको पत्रसहित बधाई
६ जेष्ठ, बर्दिया । गुलरिया नगरपालिकाले स्वास्थ्य सेवामा समर्पित कर्मचारीहरूको सेवा, निष्ठा र निरन्तरता सम्मान गर्दै महत्त्वपूर्ण तहवृद्धि (बढुवा) घोषणा गरेको छ । यसै अवसरमा नगरप्रमुख श्री मुक्तिनाथ यादवले स्वास्थ्य शाखाका सम्बन्धित कर्मचारीहरूलाई बढुवाको आधिकारिक पत्र हस्तान्तरण गर्दै हार्दिक बधाई तथा शुभकामना व्यक्त गर्नु भयो ।
नगरप्रमुख यादवले स्वास्थ्य क्षेत्रमा समर्पित कर्मशील जनशक्तिहरूको योगदानलाई उच्च मूल्यांकन गर्दै भन्नुभयो-गुलरिया नगरको समग्र स्वास्थ्य सेवा प्रणालीलाई सशक्त बनाउने आधारभूत पंक्तिमा उभिएका कर्मचारीहरूको इमानदार प्रयासको आज संस्थागत मान्यता दिइएको छ ।
बढुवा प्राप्त कर्मचारीहरू उत्साहित देखिन्थे भने स्वास्थ्य शाखा प्रमुखले यो निर्णयले थप जिम्मेवारी र सेवा–उत्कृष्टताप्रति प्रतिबद्धता बढाउने विश्वास व्यक्त गरे । स्वास्थ्य शाखामा कार्यरत कर्मचारीहरूको क्षमता अभिवृद्धि, मनोबल वृद्धि र पारदर्शी व्यवस्थापनप्रतिको यो कदमले नगरको सेवा प्रणाली अझै प्रभावकारी बन्ने अपेक्षा गरिएको छ ।
गुलरिया नगरपालिकाले आगामी दिनमा समेत सेवा प्रदायक कर्मचारीहरूको मूल्यांकन, प्रोत्साहन र व्यावसायिक विकासमा यस्ता कदमहरू निरन्तर अघि बढाइरहने प्रतिबद्धता जनाएको छ ।